¿Que é o Marketing Territorial?

Este concepto relativamente recente e novedoso, toca disciplinas diferentes como a economía, a socioloxía e a xeografía.

Podemos definir o marketing territorial como un plan encamiñado a deseñar accións para a promoción económica dun territorio, tendo gran relevancia como parte importante da elaboración dunha estratexia de desenvolvemento local e sostible nun concello ou comarca.

Nesta estratexia de desenvolvemento local, xunto ao desenvolvemento económico e a promoción territorial, deben explicitarse as liñas encamiñadas a conseguir o aumento da calidade de vida dos cidadáns, a protección do medio ambiente, a difusión cultural e a atracción de recursos do exterior mediante novos inversores.

No contexto de desenvolvemento económico local, a problemática do marketing territorial caracterízase por dous factores dominantes:

·         O marco lexislativo: Recentemente os organismos de ámbito local cambian o seu papel pasivo por unha actuación directa na intervención económica en favor do desenvolvemento territorial. O papel da descentralización e os novos enfoques ascendentes marcan as novas liñas de actuación.

·         A realidade socioeconómica actual: A acción económica das colectividades locais sitúase nun medio dominado pola crise, caracterizándose o territorio pola súa fraxilidade. O crecemento das actividades económicas locais e a atracción de novas empresas constitúen á vez medios de preservar o emprego local e de garantir recursos fiscais, susceptibles de ser invertidos  noutros esforzos de desenvolvemento territorial.

O marketing territorial promove a identidade da zona, permitindo crear a través dun proceso colectivista unha imaxe de marca-territorio. Constitúese polo tanto como un produto, explotado pola colectividade á cal lle reporta un beneficio común. Achégaselle aos cidadáns unha maior satisfacción á vez que se atrae a turistas e inversores. Todos xuntos promoverán e permitirán  a mellora tanto do nivel como da calidade de vida dese territorio.

Sen embargo, para tal fin é necesario ese sentimento de identidade que a cotío non existe no noso país, ¿a nivel local, cres que o concello de A Estrada está o suficientemente preparado para levar a cabo unha iniciativa deste tipo? ¿Realmente posuímos ese sentimento de pertenza e identidade cara a nosa terra, enfatizando o colectivismo por encima do individualismo, que nos permita actuar como unha única “marca”?

Múltiples son as posibilidades do noso pobo: eventos como a Feira do Moble (exportando a imaxe de Capital do moble de Galicia), a gastronomía, a Festa do Salmón e o atractivo turístico dos tres cotos salmoneiros máis importantes de toda a Comunidade Autónoma (Sinde, Ximonde e Couso no río Ulla), a dinamización da industria pola situación xeográfica e estratéxica da vila, as exposicións e iniciativas en favor da defensa da cultura local, son algúns factores que poden axudar a crear esa marca e identidade local na poboación. Ditos exemplos non se deben confundir co denominado marketing empresarial, xa que unidos e combinados tódolos factores, xerarán esa defensa e sentimento de pertenza por posuir unha riqueza dun valor incalculable, no cal as plusvalías irán dirixidas ao conxunto do pobo.

 Está nas nosas mans....